Kicukiro-Gahanga: Umwanda n’umunuko ukabije byugarije uruganda rutunganya ibikomoka kuri voka.

Abacuruzi n’abashoramari bakorera mu murenge wa Gahanga mu karere ka Kicukiro mu cyanya cyahariwe inganda bavuga ko bahangayikishijwe n umunuko uturuka mu ruganda rutunganya ibikomoka kuri voka, uruganda ruherereye munsi y’agaciriro ka Gahanga.

Bamwe mu bafite inganda hafi yaho uru ruganda rukorera, bavuga ko mu masaha yose yakazi haturuka umunuko ndetse n’amasazi bayobewe impamvu.

**Iyo winjiye muri uru ruganda usanganirwa n umunuko ukabije.**

**Voka ziboze zaramaze kwangirika zitegerejwe kujyanwa mu ruganda.**

**Umwanda ukabije ubarizwa muri uru ruganda rutunganya ibikomoka kuri voka**

**Biravugwa ko imodoka ziba zipakiye uyu musaruro zihamara iminsi zitegereje ko bazemerera gupakurura**

**Ibi ni ibyobo byuzuyemo amazi aturuka mu ruganda anuka**

Umwe mu bashoramari bafite uruganda muri aka gace utashatse ko amazina ye atangazwa mu nkuru yatangarije ikinyamakuru Uruvugiro ko uru ruganda batazi neza ibihakorerwa ahubwo bumva ko batunganya ibikomoka ku musaruro wa voka, ariko bakibaza impamvu haturuka impumuro mbi.

Mu magambo ye ati “mu by’ukuri turabangamiwe.Ntituzi iki kibazo uburyo kigakemuka.Turasaba ubuyobozi kudufasha kuko ba nyir’uruganda twabamenyesheje ikibazo duhura nacyo cy’umunuko ukabije uturuka mu ruganda rwabo, ariko no kugeza n’iyi saha bakiburiye igisubizo. Turibaza amaherezo y’iki kibazo. Turasaba ubuyobozi gukora ibishoboka byose bagakebura ba nyiri ruganda bakagira isuku. Ni byiza ko abanyamakuru mwaje kudukorera ubuvugizi. Bibaye byiza mwakwegera urwo ruganda mu kinjiramo mukaturebera ibihakorerwa kuko twe byaraturenze.

Twegereye uru ruganda aho rukorera dusanga mu byukuri hari umwanda ukabije. Izi voka bahazana ziba zaraboze izindi zipakiye hanze ku buryo zihamara n’iminsi zitarapakururwa.Iyo winjiye muri uru ruganda uhasanga abakozi bari gupakurura voka zaboze izindi ziri mu dutebo twa pulasitike zijojoba amazi anuka,ndetse n ibyobo byamazi mabi biba byuzuye. Iyo ugeze mu marembo y’uru ruganda usanganirwa n’amazi y’umukara anuka aturuka muri uru ruganda.

Twabajije umwe mu bakozi b’uru ruganda impamvu aho bakorera batagira isuku,batubwira ko ibyo bakora bigoye guhorana isuku. Ngo bityo rero kubera umusaruro mwinshi, ubageraho uba umaze kwangirika bikagora guhorana isuku.

Tukimara kubona ibi, twavugishije ubuyobozi bw’umurenge wa Gahanga ndetse n’akarere ka Kicukiro batubwira ko bagiye koherezayo ikipe y’ubugenzuzi kugirango barebere hamwe iki kibazo ndetse nuburyo cyakemuka.

Ni kenshi ubuyobozi bushishikariza abacuruzi ndetse n’abashoramari kugira isuku aho bakorera, nibyo batunganya cyane mu nganda, kugira ngo hato na hato badakwirakwiza ziterwa n’umwanda,dore ko voka ari kimwe mu bihingwa byangirika vuba,bikaba bisaba kwitwararika mu kubibika.

Post Views: 5,773