Abantu umunani bamaze kwemezwa ko bahitanywe n’impanuka ikomeye yabereye mu gace ka Ttuleera ku muhanda uhuza Masaka na Kyotera muri Uganda.

Amakuru y’ibanze agaragaza ko ikamyo ifite pulake T813 DYP yavaga muri Tanzania yagonganye na taxi ifite pulake UBH 378W, yari ihagaze ku ruhande rw’umuhanda irimo imanura abagenzi.

Ababonye iyo mpanuka bavuga ko ikamyo yagonze iyo taxi n’imbaraga nyinshi, ibintu byatumye abantu benshi bahasiga ubuzima ako kanya, mu gihe abandi bakomerekeye bikomeye.

Raporo z’ibanze zerekana ko abantu benshi bakomerekeye muri iyo mpanuka bagize ibikomere bikomeye birimo kuvunika amaguru n’ibindi bice by’umubiri. Abakomeretse bahise bajyanwa mu bitaro bitandukanye kugira ngo bahabwe ubuvuzi bwihuse.

Inzego z’umutekano n’izishinzwe umutekano wo mu muhanda zahise zigera aho impanuka yabereye zitangira iperereza kugira ngo hamenyekane icyateye iyi mpanuka yateje akaga gakomeye.

Iyi mpanuka yongeye gukangurira abatwara ibinyabiziga kubahiriza amategeko y’umuhanda no kwitwararika cyane cyane mu gihe bahura n’ibinyabiziga bihagaze ku nkengero z’umuhanda.

Amakuru arambuye kuri iyi mpanuka turacyayakurikirana, tukaba turi buze kuyabagezaho uko agenda amenyekana.