Abantu bamaze kwandura indwara ya Marburg bageze kuri 56 barimo barindwi banduye kuri uyu wa Mbere.
Minisiteri y’Ubuzima yatangaje ko mu Rwanda abantu bamaze kwandura indwara y’umuriro ukabije iterwa na virusi ya Marburg ari 56 barimo barindwi banduye kuri uyu wa Mbere.
Kuri uyu 7 Ukwakira 2024, nta muntu n’umwe iyi ndwara yigeze yica mu Rwanda. Gusa abo imaze kwica muri rusange ni 12.
Kuri uyu munsi nta n’uwakize, gusa abamaze gukira bose muri rusange ni umunani. Abakirwaye bose ni 36
Mu rwego rwo guhashya iki cyorezo, kuri uyu wa Mbere kandi u Rwanda rwakiriye inkingo 700 ziturutse mu kigo Sabin Vaccine Institute. Ni mu gihe ibikorwa byo gukingira byakomereje ku baganga by’umwihariko abari guhangana n’iki cyorezo.
Marburg ni icyorezo kirangwa n’umuriro ukabije, kubabara umutwe bikabije, kubabara imikaya, gucibwamo no kuruka.
Uburyo bwo kuyirinda ni ukwirinda kwegerana cyane cyangwa gukora ku muntu wagaragaje ibimenyetso no kugira isuku.
