Mu gihe Uganda ikomeje kunamira abana n’abarezi bahitanywe n’impanuka ikomeye y’imodoka ya King David Junior School, inkuru ya Keith, umwe mu banyeshuri bari muri iyo modoka, yakomeje kuvugisha benshi kubera uburyo yarokotse mu buryo budasanzwe.

Amakuru yakwirakwiye ku mbuga nkoranyambaga avuga ko Keith yari yamaze kubarirwa mu bapfuye nyuma y’iyo mpanuka, umurambo we ujyanwa mu buruhukiro bw’Ibitaro Bikuru bya Mbale.

Bivugwa ko igihe undi mubyeyi yari yagiye gushaka umurambo w’umwana we muri ubwo buruhukiro, yabonye Keith agenda akoma intoki. Yahise yihutira gutabaza abaganga, bamusuzumye basanga agifite ubuzima, bahita bamwimurira mu bitaro kugira ngo akomeze kwitabwaho.

Nubwo iyi nkuru yakwirakwiriye cyane ku mbuga nkoranyambaga, kugeza ubu nta rwego rwa Leta ya Uganda cyangwa ibitaro rwa Mbale rurayemeza ku mugaragaro. Bityo, amakuru ajyanye n’uko Keith yarokotse akwiye gufatwa nk’ataremejwe n’inzego zibifitiye ububasha.

Imvano y’iyi mpanuka

Ku wa 16 Nyakanga 2026, bisi ya King David Junior School yari itwaye abanyeshuri bari bavuye mu rugendoshuri yakoze impanuka ikomeye mu Karere ka Kapchorwa, hafi y’umuhanda ujya i Mbale.

Iyo mpanuka yahitanye abantu 24 barimo abanyeshuri n’abarezi, mu gihe abandi benshi bakomeretse bajyanwa kuvurirwa mu bitaro bitandukanye.

Nyuma y’iyi mpanuka, ubuyobozi bwa Uganda bwatangaje ko hagiye gusuzumwa uburyo ingendoshuri zikorwa ndetse hashyirweho ingamba zo kurushaho kurinda ubuzima bw’abanyeshuri.

Inkuru yateguwe na Ramesh Nkusi.

Ufite amakuru, ikibazo cyugarije abaturage cyangwa ushaka kwamamaza ibikorwa byawe? Twandikire kuri WhatsApp ya Uruvugiro.rw.