AMAFOTO: Bwana KAMAYIRESE umuyobozi wa “RLA, yahaye ibyishimo impunzi z’abarundi zituye MAHAMA.

Impunzi z’Abarundi zicumbikiwe mu nkambi ya Mahama, mu Karere ka Kirehe, bahawe impamyabumenyi (Certificates) zigaragaza ko basoje amasomo y’icyiciro cya kabiri mu bijyanye n’ubukorikori bw’impu, binyuze muri gahunda ya Made in Rwanda cyane muri Rwanda Leather Association igamije guteza imbere ubumenyingiro n’imirimo yihangira agaciro.

Aya masomo yibanze ku gukora ibikomoka ku mpu, harimo inkweto, imifuka n’ibindi bikoresho bifite isoko mu gihugu no hanze yacyo. Yatanzwe mu rwego rwo gufasha impunzi kubona ubumenyi bubafasha kwihangira imirimo no kwigira mu buryo burambye.

Uyu muhango wo gutanga izi mpamyabumenyi wari witabiriwe n’abayobozi batandukanye, barimo D’amour Kamayirese, Umuyobozi wa “Rwanda Leather Association, wari umushyitsi mukuru, wanagize uruhare mu gutanga zimwe muri certificates ku rubyiruko rwashoje amasomo.

Mu ijambo rye, Kamayirese yashimangiye ko u Rwanda rukomeje kugaragaza indangagaciro zo gufasha no gufatanya n’abandi, hatitawe ku nkomoko yabo.

Yagize ati:“U Rwanda ni igihugu gifite umutima wo kwakira no gufasha. Ibi dukora ni bimwe mu byo twatojwe n’Indangagaciro z’Igihugu n’icyerekezo cyashyizwe imbere n’Umukuru w’Igihugu, Nyakubahwa Perezida Paul Kagame. Kwakira impunzi zaduhungiyeho si ukubaha icumbi gusa, ni no kubaha ubumenyi bubafasha kwihangira imirimo no kwigira. Ibi ni ikimenyetso cy’uko u Rwanda rufite icyemezo cyo kubana neza n’abaturanyi no kubafasha gutera imbere.”

Yongeyeho ko ubumenyi mu bijyanye n’impu bufite amahirwe menshi ku isoko, asaba abasoje amasomo gukomeza gushyira mu ngiro ibyo bigishijwe, bakabyaza umusaruro impano n’ubumenyi bahawe.