NYARUGENGE: Urugaga rw’abagore rushamikiye ku muryango FPR Inkotanyi mu murenge wa Kigali biyemeje guhangana n’ikibazo cy’inda ziterwa abangavu.

Urugaga rw’abagore rushamikiye ku muryango FPR Inkotanyi mu Karere ka Nyarugenge mu murenge wa Kigali biyemeje kurwanya amakimbirane no guhangana n’ibibazo by’inda ziterwa abangavu.

Ibi byavugiwe mu nteko rusange y’abagize urugaga rw’abagore rushamikiye ku muryango FPR Inkotanyi mu murenge wa Kigali kuri uyu wa gatandatu tariki 30/5/2026 mu rwego rwo kurebera hamwe ibyagezweho n’ibiteganywa gukorwa muri gahunda ziri imbere.

Umuyobozi w’urugaga rw’abagore rushamikiye ku muryango FPR Inkotanyi, Madame “KAYITESI Jeanne D’ARC. Yavuze ko biyemeje guhangana n’ibibazo bibangamiye abaturage batuye mu murenge wa Kigali.

Aganira na URUVUGIRO.RW Madame “KAYITESI Jeanne D’ARC, yavuze ko uruhare rw’umugore ari ingenzi mu gufasha umuryango kubaho kandi utekanye, haba mukurwanya igwingira umugore abifitemo uruhare, gutanga uburere ku bana, kurinda abana guta amashuri, no kurinda amakimbirane mu muryango.

Haganiriwe ku gaciro ku mugore mu kubaka umuryango ushoboye kandi utekanye

Abagize urugaga rw’abagore rushamikiye kuri FPR Inkotanyi kandi baganiriye ku myitwarire ikwiye kuranga Umunyamuryango, n’inshingano z’Umugore n’uruhare rwe mu ishyirwa mu bikorwa rya Manifesto y’Umuryango FPR-Inkotanyi.

Mu kiganiro cyatanzwe n’umugore witeje imbere Madame “DUSABEMARIYA Odette, yashimiye cyane ibyiza umuryango RPF Inkotanyi wamugejejeho, agaruka ku buryo umugore yakwiteza imbere atangiriye ku igishoro gito akagera ku byiza byinshi nk’ibyo yagezeho. Yongeye kandi kugaragaza ko umugore akwiriye gutinyuka agakora adategereje umugabo.

Umuyobozi wa Komisiyo y’imiyoborere myiza muri RPF Inkotanyi mu murenge wa Kigali bwana NKURUNZIZA Idrisa, yerekanye uruhare rw’umugore avuga ko uhaye umugore umwanya agera ku iterambere rirambye.

***Umuyobozi wa Komisiyo y’Umiyoborere myiza muri RPF Inkotanyi mu murenge wa Kigali NKURUNZIZA Idrisa***

Mu ijambo ry’umushyitsi mukuru madame “MUKAMUVUNYI Sophie, yashimiye cyane abateguye iki gikorwa, asaba abagore gukomeza kugira uruhare mu iterambere ry’igihugu, ndetse no kugira uruhare mu iterambere ryo mu ngo zabo kuko niho ritangirira.

Yagarutse ku mugore mu rugo nka mutimawurugo ko iyo atakaje inshingano, urugo ruba rurangiye, kuko ibibazo byugarije umuturage atari bimwe by’ubukene gusa, kuko n’urugo rwinjiza amafaranga rushobora guhura n’ibyo bibazo, ari nayo mpamvu agomba kumenya gucunga neza umutungo winjiye mu rugo

Iki gikorwa cyaranzwe no kuremera abangavu babyaye inda zitateganyijwe. Urugaga rw’abagore mu murenge wa Kigali kandi rwatanze inkunga izakoresha mu gikoni cy’umudugudu mu rwego rwo kurwanya imirire mibi n’igwingira.

Inteko yasojwe n’ubusabane ku banyamuryango bishimira ibyo bagezeho. Reba andi mafoto yaranze igikorwa cy’inteko rusange y’urugaga rw’abagore rushamikiye ku muryango RPF Inkotanyi mu murenge wa Kigali.