Gen. Muhoozi Yemeje ko Ari We Wirukanye Martha Karua muri Uganda
KAMPALA, UGANDA – Umugaba Mukuru w’Ingabo za Uganda (CDF), Muhoozi Kainerugaba, yatangaje ko ari we wafashe icyemezo cyo kwirukana umunyamategeko n’umunyapolitiki wo muri Kenya, Martha Karua, nyuma yo kumwima uburenganzira bwo kwinjira muri Uganda.
Mu butumwa yashyize ku rubuga rwa X, Muhoozi yagize ati: “Ntimugashinje data mukuru kuri iki cyemezo. Ni njye ubwanjye wirukanye Martha Karua. Ntabwo yemerewe kongera kwinjira mu gihugu cyacu.”
Ibi byabaye nyuma y’uko Karua ageze ku Kibuga Mpuzamahanga cy’Indege cya Entebbe aje gukurikirana urubanza rw’umunyamategeko n’umunyapolitiki wa Uganda, Erias Lukwago. Gusa yahise afatirwa ku kibuga cy’indege, yangirwa kwinjira ndetse asubizwa muri Kenya.
Muhoozi yavuze ko iki cyemezo kiri mu rwego rw’ibikorwa by’umutekano Uganda iri gukora mu guhangana n’ibyo yise amatsinda ya politiki ashyigikiwe n’abanyamahanga. Yongeyeho ko inzego z’umutekano ziteguye gukumira uwo ari we wese zibonamo ibikorwa bishobora guhungabanya umutekano w’igihugu.
Martha Karua ni muntu ki?
Martha Karua ni umwe mu banyamategeko n’abanyapolitiki bazwi cyane muri Kenya. Yabaye Minisitiri w’Ubutabera hagati ya 2005 na 2009, anaba Depite uhagarariye agace ka Gichugu imyaka myinshi. Mu matora ya Perezida wa Kenya yo mu 2022, yabaye umukandida wungirije wa Raila Odinga, ibintu byamugize umwe mu bagore bageze kure muri politiki ya Kenya.
Karua azwi cyane nk’umunyamategeko uharanira uburenganzira bwa muntu ndetse n’imiyoborere ishingiye kuri demokarasi. Mu myaka ishize yabaye mu itsinda ry’abunganira Dr. Kizza Besigye, umwe mu batavuga rumwe n’ubutegetsi bwa Perezida Yoweri Museveni.
Si Ubwa Mbere Ahuye n’Ikibazo nk’Iki
Ibi si ubwa mbere Martha Karua yangiwe kwinjira mu gihugu cyo mu karere. Muri Gicurasi 2025, yirukanywe muri Tanzania ubwo yari agiye gukurikirana urubanza rw’umunyapolitiki utavuga rumwe n’ubutegetsi bw’icyo gihugu, Tundu Lissu. Icyo gihe nabwo byakuruye impaka nyinshi ku burenganzira bw’abanyamategeko n’ubwisanzure bwo gukurikirana imanza mu karere ka Afurika y’Iburasirazuba.
Impaka Mu Karere
Kwirukanwa kwa Karua kwamaganwe n’inzego zitandukanye zirimo Urugaga rw’Abavoka muri Kenya (LSK), Urugaga rw’Abavoka muri Uganda (ULS) ndetse n’Urugaga rw’Abavoka rwa Afurika y’Iburasirazuba (EALS), byasabye ibisobanuro ku mpamvu y’iki cyemezo.
Abasesenguzi bavuga ko iki kibazo gishobora kongera impaka ku iyubahirizwa ry’uburenganzira bwa muntu, ubwisanzure bw’abanyamategeko ndetse n’imikorere y’Umuryango wa Afurika y’Iburasirazuba (EAC), cyane cyane mu gihe imanza z’abatavuga rumwe n’ubutegetsi zikomeje gukurikiranwa n’akarere kose.
