GS Karama: Abanyeshuri baravugwaho gukina urusimbi na gaming mu masaha y’amasomo
Kigali — Ababyeyi n’abaturage bo mu gace ka Karama barasaba inzego bireba gukurikirana ibivugwa ko bamwe mu banyeshuri biga muri GS Karama bamara amasaha yagenewe amasomo bakina imikino ya gaming, aho kuba bari mu ishuri.
Inyubako aba bana bakunze gukinira game/urusimbi.
Aba baturage bavuga ko hari abanyeshuri bajya mu byumba bikorerwamo gaming mu gihe cy’amasomo. Bamwe kandi bavuga ko imwe muri iyo mikino ikinwa hakoreshejwe amafaranga, bakayita urusimbi.
Ibi bivugwa byateje impungenge ku babyeyi, cyane cyane ku bijyanye n’imyigire y’abana ndetse n’ingaruka ibikorwa nk’ibi bishobora kugira ku myitwarire yabo.
Ababyeyi basaba ko hakorwa iperereza
Abana bari mu cyumba cya gaming mu gihe cy’amasomo
Ababyeyi basaba ko inzego z’ubuyobozi n’izishinzwe uburezi zigenzura iki kibazo kugira ngo hamenyekane niba koko hari abanyeshuri basiba amasomo bakajya muri ibyo byumba mu masaha y’ishuri.
Banasaba ko hakorwa igenzura ku mikino bivugwa ko ikinirwa amafaranga, hagamijwe kumenya niba hari amategeko cyangwa amabwiriza arimo kurengwaho, cyane cyane ku birebana no kurengera abana.
Inzego zisabwa kugira icyo zibivugaho
Abaturage basaba MINEDUC, Polisi y’u Rwanda, Umujyi wa Kigali n’izindi nzego zibifitiye ububasha gukurikirana ibi bivugwa, kumenya ukuri no gufata ingamba zikwiye mu gihe haba hari amakosa cyangwa amategeko arimo kurengwaho.
Abana bashaka muri ibi byumba bya gaming
Kugeza igihe iyi nkuru yandikwaga, Uruvugiro.rw ntirwabashije kubona ibisobanuro by’ubuyobozi bwa GS Karama cyangwa izindi nzego bireba ku byerekeye ibi bivugwa.
Ni ngombwa ko amakuru atangwa n’abaturage asuzumwa n’inzego zibifitiye ububasha, kugira ngo ukuri kumenyekane kandi hafatwe ingamba zishingiye ku bimenyetso.Ku babyeyi, ikibazo cy’ingenzi ni ukumenya niba abana babo bari mu masomo mu masaha y’ishuri no kureba niba ibikorwa bya gaming bibera hafi y’ikigo bitagira uruhare mu kubakura ku masomo.
