Iran yavuze ko amasezerano n’Amerika atazakuraho uburyozwe ku byaha by’intambara
Guverinoma ya Iran yatangaje ko kuba hari ibiganiro biri kuganisha ku masezerano y’ubwumvikane (MoU) hagati yayo na Leta Zunze Ubumwe za Amerika bidakwiye gusobanurwa nk’aho ibyaha byakozwe mu gihe cy’intambara bizibagirana cyangwa bikababarirwa.
Umuvugizi wa Minisiteri y’Ububanyi n’Amahanga ya Iran, Esmaeil Baghaei, yavuze ko nubwo impande zombi zimaze kugera ku bwumvikane ku ngingo nyinshi ziri mu masezerano ateganyijwe, Iran ikomeje gushimangira ko ababigizemo uruhare bazakomeza kubazwa ibyo yakoze.
Baghaei yagize ati: “Kugera ku nyandiko y’ubwumvikane ntibivuze ko ibyaha byakozwe bizababarirwa cyangwa ngo byibagirane.” Yongeyeho ko Iran izakomeza gukoresha inzira z’amategeko mpuzamahanga kugira ngo abo ishinja ibyaha by’intambara n’ibyibasiye abaturage baryozwe ibikorwa byabo.
Ibi bije mu gihe Tehran na Washington bikomeje ibiganiro byahujwe na Pakistan bigamije kurangiza amakimbirane n’imirwano bimaze igihe hagati y’impande zombi. Abayobozi ba Iran bavuga ko byinshi mu bikubiye mu masezerano byamaze kumvikanwaho, ariko ko hakiri isuzuma rya nyuma mbere yo gufata umwanzuro wa nyuma.
Nubwo hari icyizere ko aya masezerano ashobora gufasha mu kugabanya umwuka mubi mu karere, Iran ikomeza gutsimbarara ko ubutabera bugomba gukurikizwa kandi ko ubuzima bw’abaturage bahitanywe cyangwa bagizweho ingaruka n’intambara budakwiye kwirengagizwa.
Abasesenguzi bavuga ko aya magambo ya Baghaei agaragaza ko Tehran ishaka gutandukanya inzira y’amahoro n’inzira yo gukurikirana abo ishinja ibyaha, ikemeza ko amasezerano y’amahoro atazaba inzitizi ku busabe bwayo bwo gushaka ubutabera ku byabaye mu gihe cy’intambara.
