Ubufaransa: Abantu 11 baguye mu mpanuka y’indege yari itwaye abamanukira mu mitaka
Abantu 11 bose bari bari mu ndege nto y’ubucuruzi bapfiriye mu mpanuka yabereye mu gace ka Tomblaine, hafi y’umujyi wa Nancy mu burasirazuba bw’u Bufaransa, nyuma y’uko iyo ndege ikoze impanuka mu kanya gato ikimara guhaguruka ku kibuga cy’indege cya Nancy-Essey.
Nk’uko byatangajwe n’ibitangazamakuru mpuzamahanga birimo Reuters, iyo ndege yari itwaye abantu bari bagiye gukora igikorwa cyo gusimbuka mu kirere bakamanukira mu mitaka (skydiving). Mu bayiguyemo harimo umupilote, abarimu batanu bigishaga uwo mukino n’abanyeshuri batanu bari bagiye kuwugerageza bwa mbere.
Abayobozi b’inzego z’ibanze batangaje ko iyo ndege yaguye hafi ya metero 300 uvuye ku kibuga cy’indege, ikagwa mu buryo bugororotse hafi y’umuhanda w’amagare n’ahari inyubako z’abaturage. Nta muntu wari hasi wagizweho ingaruka n’iyo mpanuka, nubwo yari hafi cyane y’ingo n’ahacururizwa.
Abatangabuhamya bavuze ko mbere y’uko indege igwa bumvise urusaku rwa moteri ruhagarara rutunguranye, nyuma indege ihita imanuka ku muvuduko mwinshi. Impamvu nyakuri y’impanuka ntiramenyekana, ariko inzego zishinzwe iperereza zatangiye gukora iperereza kugira ngo hamenyekane icyayiteye.
Minisitiri w’Umutekano w’Imbere mu Gihugu w’u Bufaransa yahise yerekeza aho impanuka yabereye, mu gihe ubuyobozi bwashyizeho itsinda rifasha imiryango y’ababuze ababo ndetse n’ababonye iyo mpanuka mu buryo bw’ubujyanama bwo mu mutwe.
